朋友A養了13年的狗狗迪仔過世，哭得死去活來。
佢
老公幫佢搵左間好好嘅寵物善終服務，陪迪仔走過最後一程。善終服務機構職員好細心，幫迪仔按摩返硬左嘅肌肉，沖完亮再幫佢梳順d
毛，A記得最後一次抱起迪仔時，佢好似只係訓著左咁軟棉棉，被風筒吹完嘅毛髮仲暖暖地。唯一唔同嘅係，A知道自己再聞唔到個陣只係屬於迪仔嘅味道。
A老公領養左一隻同迪仔細個好似樣嘅狗狗俾佢。雖然見到新狗仔個得意樣A都好鐘意，但佢每次諗起迪仔時依舊覺得好傷心，就算同一品種，個樣近乎乎一樣嘅狗仔，其實只要主人一聞就會認得出個分別。
對於愛過嘅生命，到離別時我們留得住影像，錄得底聲音，唯獨氣味，再深刻的氣味都會隨風散去。A送迪仔去火化時，喊住講左一句：好想再聞一次佢腳仔嘅味道，我好驚自己以後會唔記得。
聽完佢講我忍唔住喊左，因為我自己都養一隻10歲的比熊叫DaiDai。佢嘅健康係而家我生命中最關心嘅事，因為我知道年紀大嘅狗狗一病，尤其如果係癌症，有機會走得好快好突然。我知道如果DaiDai走左，無論我幾唔捨得都可能會有一日唔記得左屬於佢嘅氣味。
同
A一樣，我好鐘意聞DaiDai嘅味道，近乎病態。就好似媽咪會捉住自己BB對腳仔，用力深呼吸聞完然後大叫好好聞一樣。如果DaiDai識反白眼應該會
不屑左我好多次。相信只有養寵物嘅朋友會明白呢種心情。明明自己屋企隻狗仔或者猫仔有牙石，個嘴勁臭，腳仔，耳仔都有佢地獨有嘅氣味，但聞聞下就會覺得係
世界上最親切嘅氣味，每次你一返屋企，就會向你撲面而來。
唔止寵物，對住曾經深愛過嘅人，其實分手之後，有時諗返起對方都會突然好想再聞下佢陣味。
大學時候嘅室友D同男朋友分手之後一直念念不忘，試過因為太掛住對方，特登買左對方一直用開嘅香水返黎，每次諗起前男友佢就會開支香水出黎聞下，我地後來將個種香水定義為失戀嘅味道。即使彼此已經分左左好多年，只要係人群中聞到呢隻香水味，D就會諗起對方。
史鐵生係《我與地壇》一書中曾寫道：「味道是最說不清楚的。味道不能寫只能聞，要你身臨其境去聞才能明了。味道甚至是難於記憶的，只有你又聞到它你才能記起它的全部情感和意蘊。」
第一次意識到呢個世界有我知道自己會好唔捨得，但無法記得嘅氣味時，突然發現送一支香水俾一個你愛嘅人其實係一件好浪漫嘅事（當然前題係對方都鐘意個隻香水味），即使將來緣聚緣散，我地可能會有一日走散，亦最少留下一種屬於彼此回憶嘅氣味被記錄及追憶。
純粹思考題：到底影像、聲音同氣味，邊樣最容易勾起一個人對另一個人或事的回憶？
TEXT / Diana CHIU
當我讀到依一句(( 好想再聞一次佢腳仔嘅味道，我好驚自己以後會唔記得。)) 我眼淚忍不住流下來, 我還記得當日冬冬係ICU訓氧氣箱時,我喊住望住同佢講, 比我再抱多佢一次丫, 一次都好..
希望各位睇到依篇文章既主人, 當大家每日好努力工作,或者拍拖,或者打機同時,多分一點時間比佢地,因為寵物既一生有大半時間都係等待佢地最愛既主人...
你知道等待係幾難過嗎?
係呀，要好好珍惜同毛小孩的每一份、每一秒
回覆刪除全對,每一刻都記掛
刪除